كتب / سعيد الهوداني
شوفو الفقر اش داير، شوفو الغلاء شوفو الأمية،
شوفو معظم البرلمانيين ورؤساء الجماعات فاسدين كيتحاكموا، شوفو البطالة اللي غادية في تكاثر، شوفو النصابة اللي انتشر في كل مكان، شوفو الأمراض اللي مشات ورجعات بسبب سوء التغذية والعفن بحال داء السل والأمراض الجلدية، شوفو اش ديرو فالسبيتارات اللي فارغين من كلشي لا اطباء ولا دواء ولا تجهيزات، شوفو اش اديرو فالطفولة المغتصبة شوف اش يديرو فالأمهات العازبات شوف اش يديرو فالطلاق والأطفال المتخلى عنهم ، شوفو اش غادي ديرو في أزمة الماء، شوفو اش ديرو في أزمة التعليم اللي مستعصية ومالقاولها حتى حل، شوف اش ديرو مع المتطفلين اللي موجودين في مجال الصحافة ومجال الأدب والمجال الديني والمجال الجمعوي، شوفو اشديرو في الرشوة اللي مالقاوليها حتى علاج، شوفو اش ديرو فسياسة باك صاحبي شوفو اشديرو في معمري الكراسي اللي ماحقو حتى إنجاز شوفو اش ديرو فرؤساء الأحزاب اللي مكانشوفوهم حتى الانتخابات، شوف اش ديرو فالسموم القاتلة اللي كدخل بلادنا وكتحصد ارواح وليداتنا، شوف اش ديرو في مبيضي الأموال والمضاربين اللي غلاو العقار والمتاجر والمعيشة ، شوف اش ديرو مع اصحاب الماضي الاسود اللي بغاو يبيضو شخصياتهم باش يرجع الواجهة بلاحشمة، شوف اش ديرو مع اللي كاياخد شحال من راتب واحد ينسيك فالاخر ومكاين حتى انجاز، شوفو اش ديرو فالحكرة والعبودية الحداثية اللي كتمارس على الخادمات وبعض الأجراء والمياومين بالشركات والبيوت والمدارس الخصوصية والمهن الحرة ……..
الكرة ياسادة كتبقى لعبة للترفيه كنشوفوها مناسباتيا باش نتسلاو نتخلص من التعب الأسبوعي ونشجع اولادتنا ونزرع روح الانتماء.
ماشي نسييسوها وندخل في القيل و القال .
الركراكي، المنتخب الأول، الأولمبي ،السكتيوي لقجع، حكيمي رحيمي ،……..هادي اسطوانة طولات وحماضت .
شوفو اش نديرو في الأولويات اللي تنفعنا وتنفع اجيالنا الحاضرين والجايين. وخليوا كل حاجة فبلاصتها.باركة من هدر الوقت والجهد في التفاهة و اللامبالاة. شوفو شباب الدول المتقدمة كيفاش كيتصرف وكيفاش كيخدم ويدمر وكيفاش كيموت على بلاد، الأمثلة كثيرة.
صحيح ان بلادنا احسن بكثير من بعض الدول، لكن المشاكل والمعوقات مازالت كثيرة وخصها العمل الدؤوب والتضحيات الجسام من اجل تجاوزها وتحقيق الأحسن والأفضل.
نزيد ولا بركة……..