كتب _ ابن ازعير الشاعر الحاضي لحسن

عودي مربوط… مݣيد
السرج وللجام…مْحَيّْدْ
عودي ..سلاحو محطوط ..
معلݣ…. في حيوط
نحطو في الأرض… حرام
سلاحي موالف… بارودي.. حالف
ما يطردݣ غير في الغمام
عودي شريف.. شرف من عودك
عمرو ما غاب ولا حرك.. في محرك..
فيه شبهة …ولا حرام
وعودك… فين عودك ..وفين سلاحك
وفين العدة….. وفين لجام
وفين حلاوة الكلام…. وفين لغى ..بلݣجام
وفين الايام ..وفين شيوخ.. العيطة
فين لعواݣ …وفين جعيدان
حتى ملموتشو.. لي كان..
حاضر ينشط وناشط… مع ناس زمان…
وفين الزمان …الزمان
لي قاومت فيه الكلمة… جيش الطغيان
فين الزمان.. لي قادت فيه خربوعة جيش العربان
و فين صوتها لي وحد لقبايل
عرب زيان
فين كلامها لي كان مفهوم كان
على كل لسان
كلام صادق… مافيه غدر
صيتهاداوي …مدوي… في كل مكان
وفين الفرسان …لي جالو وصالو
في هضاب زعير… وفي جبال زيان
وفين وردة بلادنا… وفين عويد الرمان
شمسنا غابت ..و ليلنا طوال ..
وصباحنا ما بقا بان ..وغاب الصوت الرنان
كنت وباقا في عيني… وردة جورية…
وردية تأتت لمكان.
كنتي يا بلادي وباقا… في عيني.. أحسن البلدان
في بوعمر …فين ولادو.. فين الفقرة
فين الضمان..
علاش يا زعير …ولادك غابو ..
خير الوطا…. داوه صحابو
شعاب ٱويدان ….خيرك غطى …جميع البلدان
عودك غبر ما خلا آتر … ما بقاش يبان
وغابت معاه.. ݣاع الفرسان
ضرني خاطري …ملي غابو يازعير
معاه الفرسان
كنت قبيلة وعدتي قبايل…
فراحك تفرقت… بين البلدان
كانو جيرانك جيران …ٱسماعلة
وكانو ضيافك صحراوة بن مسكين
وبني خيران
جمعتي جميع…. البلدان .
وخيرك شاط وتفرق… على جميع البلدان
من الرماني لكل زعري… غيور في كل مكان