شعر – بوعزة الصنعاني 

عييت نْبَرْدي فالوقت
ولعمر ..
والديا گاع ما أرخوهْ .

غرفت من بحر الضحك غرفة
وحلمي لكان عويد قرفة
ولادي بالزربة سلخوهْ .

وراني عايش goutte a goutte
وايامي كلها فُوطُو كوبّي
كل نهار يشبه خوهْ .

من الدار للقهوة
من القهوة للدار
نبات نصْگل فالحروف
ونساوي ميزاني عل الظروف
نكتب والناس نيّامْ .

شعلت فقلبي عوافي
كان ضوها كافي
باش نروى من بحر الخيّام .

وليكم نحلف
حثا وليت نتلف
عل راسي، وعل سميّت ليّام .

وااااخَ بهات لوني
بات السر فشوني
وكل يوم ..
عظم من عظامي نصل .

نُوض بأحْ
نگلس بأحْ
وحثا خطواتي فيها نحصل .
نضحك ونگول
واش بالمعقول
السّي الزهايمر وصل .