شعر / عفراء حمد النيل آل تقزوز 

خطوات الشعر .. لزموها ناس قبالي
فيها المحترم … الماهو عدمان والي
بالقول الفضيح راسم حروفو وحالي
عاصر للدريب ….. لازم يمينو ومالي

فيها اللرفيق ….. بياع ودايما شالي
من نظر الخلق عز الشموخ متدالي
الشهرة إن بقت خاتاكا فوق العالي
اردما بالتواضع .. وخلي قلبك جالي

في الدنيا البقت مقدودة هشة وبالي
صاحبك إن وقع .. دورك بكون التالي
خوة قرقراب …. الناس بقت محتالِي
اختا المرمي فيها …. وفارق الرمتالي

لا تغرك نجوما …. الفي سماها تلالي
كون زولا صدوق لا تبقي فيها ضلالي
راكوبه الظروف الشفتها فيها خَلالي
من بعد العذاب بي هينه ما بتحلالي

القدر الوقع …… فوق الوجيع عبالي
غطالي الحُفر ….. بي قشة واتخبالي
للسم في العسل من دون اشوف كابالي
لي سيد القروش الناس بقت طبالي

العترة البقت … في المشية تتواتالي
محور في جمر .. للكية دوم خاتالي
الدنيا العبوس …….. اللشرك كاجالي
شدت فِي سروجا وتاني ما بترتالي

سوكاب الشلك .. سكّبني مَره سطالي
لي دار العزاب … عز الماسي خطالي
دام فوق الدموع والحسرة باقي مطالي
بالصبر الجميل لي روحي بصبح طالي
الزمن الصعيب …… يا خلا ما برتالي
جرّد للحساب … فوق النتيجة جَتالي
بي رغم الصمود .. الفيهو ضقتا كتالي
خزلان القراب ……. ضابحني اتباتالي

الرحله الطويلة … وفيها بان تجوالي
طاويها الانين … فوق الدموع عوّالي
ّمعروفة الايام … يا سِيد هوايا دوالي
والما برتكز ………. فيها بيقع طوالي

دام أيامنا من الفرحه صبحت خالي
استرا يا كريم لا يبقي مكشوف حالي
من واجبة رفيق .. لا يكترن اعضالي
من السيئات ….. لايبقى فيها مشالي