بقلم : إيمان الونطدي‎

مللي تنفكر ف لبدايه و نسترجع لحكايه و نتذكر أن آدم مللي نزل للأض كان هو وحواء عرايا . كنتساءل كيف كانوا قبل ما ينزلو واش كانو فعلا مستورين و شنو ساترين واش نزلو معريين من النعمه أو معريين من لباسهم ..بغيت نفهم واش كان لعرا حرام .

و رجعت نسول راسي مللي تزاديت أنا واش نزلت لهاذ الكون حامل معايا كتابي ب شمالي أو غير حاكموني قبل ما يتدون لمكتاب ؟

بغيت نفهم واش “مي” اللي مارضعتش حليبها و ما شميتش شونها واش بالصح مي أو غير سبحت فماها تسع شهور و زحماتني لحمه .. واش أنا بالصح ولد لحرام و علاش سماوه حرام و علاش حرام أصلا . واش” مي” تا هي ذوقات” با” التفاحة أو قسموها بزوج و عجباتهم حلاوتها و مللي لبذرة نبتات ف بطن” مي” ” با “هز رحالو و قصد جنان شجر تفاحو مسيج بحبال .. و حواء مقيدينها ف قصر ف جبل عالي . و” با “بحال جميع رجال صدق أن لمقيده حره بنت حر و نسى أن سجانها هو غيات ليلها و ساقي عطشها مللي يسخن حالهم بزوج . بغيت نعرف هاد لحرام اللي زطم فليلة حالكه و زلقت منو شهوة … اش كان خاصو يدير ؟؟؟؟ و كثر عليا التسوال .. شكون هما ولاد لحرام و علاش ولاد لحرام ..تقلب ليا ميزاني و بديت نبحث .. ولقيتهم …. لقيتهم كثار.. لكن ماشي كلهم بحالي !!!!