زجل / بوعزة الصنعاوي

حالة كتابة …
ملي تجيني لكتابة
تنصب لي مصيدة
نتحرق
نتحرق
تقول غ سبول فحصيدة
لمرا ناعسة حدايا
وانا فالنعاس
معنق لقصيدة .

اش كان ف لكتابة ذنبي
نفيق
نلقى جوجات ف جنبي

كلها
وشعرها
كلها
وريحت عطرها
ولكل وحدة لونها
واسرار فعيونها
تقول
خواتم الرصاص بلدونها

وغير نبدا نكتب
كلي نتحل
يسرح فيا نحل
ونبدأ كلي ندوب
ونراري بصح وكدوب
تنهيدة فصدر مجذوب
ندوب
نتفكر ف لكتابة حبابي
لدقو ف دفت بابي

حيين وميتين
نغرف فالوجد مرة
قول نغرق مرتين

نتكى وهما حدايا يتكاو
تضحك ليا الدنيا ايلا ضحكو
وتكحال فعيني ايلا بكاو
ونقول نوعى
نخرج من حلمتي
وفكل مرة
نحنت فكلمتي

وانا
كالگصيبة يديها الريح
وروحي بينهم مجنونة

نوض ونطيح
بين جذبة وشطيح
ونفسي ب لقصيدة مسكونة

ونرجع تاني نكتب
تتبرم هيا من قدامي وتهرب
ونول هذا شعرها
هذي ريحت عطرها
قول كلشي هنا ديالها
نقلب الورقة
يلقاني فالورقة خيالها

وانا نظل فالكرفي
لمرا عليا مكتوبة
لكن لقصيدة
متزوجها عرفي

كنت صغير وشاب
واليوم
تبليت
بحب لقصيدة على شرفي

ونهار السوق
نقول للحب عايا
تجلس لمرا فالدار
وتخرج لقصيدة معايا

تجري تجري بلا حزارة
عند صحاب الخضرة
والعطرية
وف گرنت لگزارة

وف الزحمة تغبر
نبري ف كل بر
وما نعرفهاش فين
نتسنى سنة
نتسنى سنين

نوض نقول اح
نجلس نقول اح
والقلب بيها ينين

تحرار لكتابة
لكن
انتظار لقصيدة
يبقى بنين