خواطر من (أنا والحياة) للكاتبة والاديبة المصرية الأستاذة سناء شمس الدين (عيشوا الحياة بجمالها)
دة. سناء شمس الدين
ساعتين مضت
كتب / الاستاذة سناء شمس الدين
الحقوا خُدوا من الحياة حياة! عيشوا الحياة بكل جمالها، واغتنموا الأوقات الجميلة، وحافظوا على الأشخاص الطيبة النقية، واستمتعوا بشروق الشمس وروعة الكون، وتأملوا جمال الغروب، وفي تلك اللحظة تذكّروا أن دوام الحال من المحال، وأن كل شيء مجرد وقت، وسيمضي ويزول…
الحياة مش محتاجة فلسفة ولا عباقرة، ولا مدّ وجزر طول الوقت، الحياة محتاجة ناس تحس ببعضها، ناس تتسم بالمشاعر الإنسانية الصادقة.
عيشوا مشاعر الحب والمودة والعطاء، وعبّروا عن حبكم لبعض، ما تضيّعوش العمر في البُعد والتحفّظ. مفيش حاجة اسمها اتقل في مشاعرك على غيرك؛ فالناس السوية بتتعامل بتلقائية، وبتستشعر قيمة النعم، وبتقدّر كل لحظة بتعيشها.
والجميل إن ربنا يخلّينا نشوف الناس بقلوبنا مش بعيوننا، ودي قوة البصيرة اللي ربنا منحها للإنسان؛ إنك تشوف جوهر الناس، وتحس بيهم بعيدًا عن المظاهر والأقنعة.
عيشوا، واتعاملوا بجمال الروح، ونقاء القلب، ومرونة الطبع، وحكمة العقل. حبّوا بعض أوي، وكونوا سند وونس لبعض؛ لأن العمر مهما طال فهو قصير، ولما نفارق بعض مش بنرجع تاني.
تعالوا نفهم بعض صح، ونكون أحنّ على بعض، ونختار الكلمة الهنيّة النّديّة، ونمد إيدينا بالمحبة، ونكون بلسمًا لجراح بعض.
فالحياة أقصر من أن نُهدرها في البُعد، وفي الصمت العقابي، وفي معتقدات خاطئة، وأجمل من أن نعيشها خلف أسوار التحفّظ. أحبّوا بصدق، وعبّروا عن مشاعركم، واتركوا ذكرى طيبة، فقد تكون أجمل هدية.
2026-11-14